EP. 13 片頭
各位線頂ê聽眾朋友ta̍k-ê平安ta̍k-ê好，歡迎收聽做工á人phá-kheh-su̍h-to͘h，真歡喜koh hâm ta̍k-ke tī空中再相會！
時間過tio̍h chiâⁿ緊，目1 nih，咱A郎ê故事已經進行kàu siōng尾pha，真多謝各位聽眾朋友一直支持，m̄知goán用心製作ê故事，各位聽tio̍h有kah意--無？
是--lah，chiâⁿ緊neh！當初tú開始ê時，siáⁿ lóng m̄-bat，ta̍k項lóng to̍h ta̍uh-ta̍uh-á研究，chit-má ka想，lóng是血kah目屎neh！
是--lah！我有1 kang poa̍h倒chhè破皮，疼kah流目屎！
M̄-sī hit款血kah目屎--lah！
總--是頭已經洗--lòe，硬thuh mā to̍h thuh kah soah！不管如何，咱已經完成咱ê任務，beh kā各位講再會--ā！咱工作室今á日解散！眞感謝ta̍k-ke長久以來ê支持tàu-sio-thīn！
等--leh等--leh！Siáng講beh解散？你講beh解散to̍h解散我m̄-to̍h真無面子！話lóng hō͘你講to̍h好--ah！
無解散我是beh án-chóaⁿ放假？我beh放假！放假lah！
你teh做台語koh siàu想beh放假！有夢siāng súi，希望siong隨lah！各位聽眾真歹勢！Goán做工á人工作室ē繼續phah-piàⁿ，期待tī無jōa久ê未來koh ē有新ê作品來hâm ta̍k-ke分享！Sòa--lòe是咱A郎最後ê部分，ǹg望各位聽tio̍h ē kah意，來，請奏音樂！
放…假…放…假…
Kok-ūi sòaⁿ-téng ê thiaⁿ-chiòng pêng-iú ta̍k-ê pêng-an ta̍k-ê hó, hoan-gêng siu-thiaⁿ chò-kang-á-lâng phá-kheh-su̍h-to͘h, chin hoaⁿ-hí koh hâm ta̍k-ke tī khong-tiong chài-siong-hōe!
Sî-kan kòe tio̍h chiâⁿ kín, ba̍k 1 nih, lán A-lông ê kò͘-sū í-keng chìn-hêng kàu siōng bóe pha, chin to-siā kok-ūi thiaⁿ-chiòng pêng-iú it-ti̍t chi-chhî, m̄-chai goán iōng-sim chè-chok ê kò͘-sū, kok-ūi thiaⁿ tio̍h ū kah-ì--bô?
Sī--lah, chiâⁿ kín neh! Tong-chho͘ tú khai-sí ê sî, siaⁿh lóng m̄-bat, ta̍k-hāng lóng to̍h ta̍uh-ta̍uh-á gián-kiù, chit-má ka siūⁿ, lóng sī hoeh kah ba̍k-sái neh!
Sī--lah! Góa ū 1 kang poa̍h-tó chhè phòa-phôe, thiàⁿ kah lâu-ba̍k-sái!
M̄-sī hit khoán hoeh kah ba̍k-sái--lah!
Chóng--sī thâu í-keng sé--lòe, ngē thuh mā to̍h thuh kah soah! Put-koán jû-hô, lán í-keng oân-sêng lán ê jīm-bū, beh kā kok-ūi kóng chài-hōe--ā! Lán kang-chok-sek kin-á-ji̍t kái-sàn! Chin kám-siā ta̍k-ke tn̂g-kú í-lâi ê chi-chhî tàu-sio-thīn!
Tán--leh tán--leh! Siáng kóng beh kái-sàn? Lí kóng beh kái-sàn to̍h kái-sàn góa m̄-to̍h chin bô bīn-chú! Ōe lóng hō͘ lí kóng to̍h hó--ah!
Bô kái-sàn góa sī beh án-chóaⁿ pàng-ká? Góa beh pàng-ká! Pàng-ká lah!
Lí teh chò Tâi-gí koh siàu-siūⁿ beh pàng-ká! Ū bāng siāng súi, hi-bōng siong sûi lah! Kok-ūi thiaⁿ-chiòng chin pháiⁿ-sè! Goán Chò-kang-á-lâng Kang-chok-sek ē kè-sio̍k phah-piàⁿ, kî-thāi tī bô jōa kú ê bī-lâi koh ē ū sin ê chok-phín lâi hâm ta̍k-ke hun-hióng! Sòa--lòe sī lán A-lông chòe-āu ê pō͘-hūn, ǹg-bāng kok-ūi thiaⁿ tio̍h ē kah-ì, lâi, chhiáⁿ chàu im-ga̍k!
Pàng-ká, pàng-ká…
EP. 13 片尾
Aih，我真正無法度放假--o͘h？Lín nah ē hiah酷刑？
Ke講--ê！Iau狗koh leh siàu想豬肝骨！Goán投過票--ah，你kā我留tī chia繼續做khang-khòe！
我to m̄是烏狗兄A明koh，講我是iau狗siuⁿ超過--lah！
M̄管--lah，你soah無看tio̍h在場ê各位，lóng giú布條á teh反對你放假！你好thang認命--lah！
Hó͘，lín che是多數暴力neh！(thêng)…是講nah ē ta̍k-ê lóng tī放送ê現場--ah？是發生siáⁿ tāi-chì！
你koh bē記chit咱今á日A郎最後1 chhut，片尾有beh做特別節目o͘h？你是iáu-bē睏醒a̍h是koh leh醉？
Tio̍h hoⁿh，hit日我to̍h有影有收tio̍h批來kā我通知，soah lóng ka放ho͘ bē kì…。我kui kang lóng leh想講ài用siáⁿ辦法，chiah有法度用siāng緊ê速度kā王phah--死…。
你to̍h是án-ne--lah！Chiah無人beh hō͘你放假！應該--ê你！好--lah，m̄ hâm你話仙--a，認真來主持，今á日goán特別邀請goán所有ê工作人員來到現場，goán這ê節目製作ê時間mā差不多有半冬，ta̍k-ê lóng是用ka-tī khang-khòe以外ê時間，來做chit ê節目，到taⁿ，咱所做ê影片已經放送完成，想beh請ta̍k-ê來講kóa參與chit ê製作ê心聲心情án-ne。
有影，ta̍k ê to̍h lóng ài擠時間出來做，真辛苦！
你lóng leh phah電動！無資格應chit款話--lah！Siōng無資格講話--ê to̍h是你！咱mài ka chhap！Lín siáng beh 先講？Hiah pì-sù？無我來點名--lah！無米奶--ê，你講古--ê先邀請你來講！
Ta̍k ke好，我是Bí-leng！真榮幸，ē-tàng tī 「A郎」chit齣廣播劇來講古hō͘ ta̍k-ke聽！感謝A真in ang寫出chiah-nī趣味ê故事，mā多謝做工á人團隊ê有志，chit段時間一直kā我o-ló，hō͘我意見，我chiah ē-tàng愈講愈有信心，愈講愈輾轉，ah mā ǹg望各位聽眾lín有kah意我ê演出。是講chit集錄soah，我to̍h失業--ah neh！ Hò͘我boaih--lah我beh kho̍k碗！後1齣leh？A-chin-嫂--à！緊叫lín ang出來面對！
米奶--ê，你nah ē驚失業，我kan-na驚我無假thang放niâ！無我ê khang-khòe lóng hō͘你做--lah！
Hó͘！你無救--ah！免siàu想--lah！Mai the̍h--來，sòa--lòe，咱邀請咱ê畫師兼劇本創作，Chiá-siông！
Ta̍k-ke好，我是Chiá-siông，khah早因為khang-khòe ê關係，有1段時間，tiāⁿ-tiāⁿ leh走錄音室，自hit-tang-chūn開始，我to̍h感覺配音chit ê khang-khòe chiâⁿ趣味，無想講20 tang了後，竟然有人chhōe我tàu-tīn做台語ê節目，ah m̄ to̍h ka-chài我mā ē-hiáu講台語，chiah有chit ê機會。Chiâⁿ chōe tāi-chì to̍h是án-ne，你總是ài ē-hiáu，日後你tú tio̍h hit ê機會ê時chūn，你chiah lia̍h ē chāi，學台語無敗害lah，ta̍k-ke tàu陣來講台語，台語出頭天！
多謝Chiá-siông~~！Ĕ，奇怪？你tú-chiah nah ē講Chiá-siong是劇本？咱ê ang-á lóng伊畫--ê我知，súi koh古錐！
咱當然有後1 ê製作--ā，tī chia bē-tàng講siuⁿ chē，hō͘我神秘--1-ē！Koh來咱邀請甜粿來講！甜粿請！
Ta̍k-ke平安，我是Tiⁿ-ké。我算是siōng落尾chiah加入做工á人團隊ê成員，chin歡喜ē-ĕng saⁿ-kap來製作chia ê作品，chit-pái ē-tàng完成A-lông chit ê廣播劇實在感覺chiâⁿ sim-sek mā kài感動。因為我khah早koh án-ná想to bē想tio̍h 我竟然ē-ĕng kō͘台語來演出。Sòa--落-來mā ài請各位團員kap聽眾朋友多多指教！是講，我開始講台語ê時間應該mā是團隊--ni̍h siōng短--ê。Ùi學習Pe̍h-ōe-jī開始kā我ê母語學tńg--來有影是hō͘我ke chiok chē自信。而且mā無kài困難，mā感謝ta̍k-ke無kā我棄嫌。豐富lán ê言語，lán繼續phah-piàⁿ！
好！多謝甜粿，聽了真正hō͘人kài感動hoⁿh！Sòa--lòe tio̍h siáng？
Án-ne咱請咱負責影片、網站、程式、平台宣傳ê孤鳥、幕後ê khang-khòe差不多lóng伊teh做，phāiⁿ真重！Tio̍h你講！請！
Ta̍k-ke好，我是孤鳥，孤鳥chhah人群ê孤鳥。有1日，貓tāu傳1 ê音檔hō͘--我，講he是伊hâm A-chin in ang koh Bí-leng teh做ê tāi-chì，問我kám有趣味，kám beh加入？錄音對我來講，是1層chiok食力ê tāi-chì，尤其是beh錄1 ê kah我個性完全無kâng ê角色，he koh khah食力，só͘-pái一直hō͘團隊phah銃têng錄，不二過，終其尾iah是kā tāi-chì做好--ah。感謝團隊對我ê包容，mā感謝團隊對A郎chit ê故事ê用心，hō͘ A郎ē-sái順利chiūⁿ線，ǹg望ta̍k ê ē kah意A郎chit ê故事。
多謝孤鳥！我感覺你演出ê A明有影kài活跳neh！有夠厲害！Koh有siáng無講--tio̍h-ê？
好--lah！無換我講好--ah！
Ta̍k-ê好，我是NiauTāu，我tī團隊負責--ê是處理音檔，tī團隊內底學tio̍h真chē，親像音質ê好bái，處理ê方法無kâng，ē有真大ê精差，請ta̍k ê注心kā goán聽看māi，koh有to̍h是團隊ê ta̍k-ê lóng liâu落去錄音，chit種聲音ê表演真趣味，goán sńg了真歡喜，mā ǹg望ta̍k-ê ē kah意，最後想beh講--ê是，hō͘台語ê世界ke 1 kóa趣味ê、無kāng款ê作品，ta̍k-ê做夥來kā goán tàu捧場ŏ͘，ló͘-la̍t，多謝！
好！我to̍h簡單講到chia，多謝各位觀眾hō͘ goán chē chē ê支持kah鼓勵，koh來A郎小詞典koh有ke做幾chhut，歡迎老主顧，老朋友繼續來kā goán捧場ŏ͘！有閒koh來ŏ͘！Bái-bāi！
等--leh等--leh！我無講--tio̍h neh！
Kan-na想beh放假ê人無ài hō͘你講--lah！
你mā khah好心--leh！我mā有做khang-khòe neh！拜托--leh-lah！
好--lah！Mai sa--去！
Án-ne我mā ài來學lín講ho͘ khah感性--leh！Ta̍k-ke平安！我是A-chin in ang！多謝各位聽眾ē-tàng陪伴goán到taⁿ！心內實在真歡喜！
有ê人ē講講台語真困難，寫台文koh jú困難，我to̍h想講，不如咱來寫1 ê故事，用講古ê方式，ta̍k-ke ē-tàng用聽--ê，nā有趣味mā ē-sái來看台文是beh án-chóaⁿ寫，橫直有聲thang hō͘你對，beh當做教材來學台語ûn-ná是bē-bái，to̍h liâu--落-去--ah án-ne。Tī chia，錄音差不多是我第1遍ê經驗，nā話講tio̍h無好勢，請多多包hâm。最後我想beh感謝做工á人ê團隊，hō͘我hiah chē自由，sûi-chāi我發揮，mā教我真chē我本底lóng bē-hiáu ê tāi-chì，hâm lín鬥陣做khang-khòe，我真歡喜，尤其是ta̍k-ke同齊認真kā 1件tāi-chì完成，實在感動！親像A郎ê故事án-ne，beh做台語，kāng款ài chio 1 tīn伴做夥行khah ē快活。最後ê最後，我一定ài補充--ê to̍h是，我想beh放假！我beh歇睏！我bih--起-來ê時間iû-koh到--ah！感謝各位！
Án-ne hō͘你謝幕！
好！真正有hit款「Ah！Beh結束--ah neh！」ê心情！好！Kāng款mā是hit句多謝！Sui-bóng goán ê作品kah能力iáu有真chē進步ê空間，m̄-koh mā感謝各位hō͘ goán支持，kā goán鼓勵，請各位聽眾朋友sió等待！相信免koh jōa久！新ê作品to̍h有法度koh出世！Kāng款tī咱chit ê做工á人頻道放送！到時請各位koh繼續kā goán支持ŏ͘！Ló͘-la̍t！多謝！Pái-pāi！
再會~~！
你免soan！等--leh留落來開會haⁿh！
Ĕ~~~~~！
你是leh學he電視--ê日本má-mah kài tio̍h驚o͘h！Khah認命--leh，行lah！
Hò͘--iò͘~~~~M̄ mài--lah！
免ai！Khah認份--leh！
Aih, góa chin-chiàⁿ bô-hoat-tō͘ pàng-ká--o͘h? Lín nah ē hiah khok-hêng?
Ke kóng--ê! Iau-káu koh leh siàu-siūⁿ ti-koaⁿ kut! Goán tâu kòe phiò--ah, lí kā góa lâu tī chia kè-sio̍k chò khang-khòe!
Góa to m̄-sī o͘-káu hiaⁿ A-bêng koh, kóng góa sī iau-káu siuⁿ chhiau-kòe--lah!
M̄-koán--lah, lí soah bô khòaⁿ tio̍h chāi-tiûⁿ ê kok-ūi, lóng giú pò͘-tiâu-á teh hoán-tùi lí pàng-ká! Lí hó thang jīn-miā--lah!
Hó͘, lín che sī to-sò͘ po̍k-le̍k neh!… Sī kóng nah ē ta̍k-ê lóng tī hòng-sàng ê hiān-tiûⁿ--ah? Sī hoat-seng siáⁿ tāi-chì!
Lí koh bē-kì-chit lán kin-á-ji̍t A-lông chòe-āu 1 chhut, phìⁿ-bóe ū beh chò te̍k-pia̍t chiat-bo̍k o͘h? Lí sī iáu-bē khùn-chhíⁿ a̍h-sī koh leh chùi?
Tio̍h hoⁿh, hit ji̍t góa to̍h ū-iáⁿ ū siu tio̍h phoe lâi kā góa thong-ti, soah lóng ka pàng ho͘ bē-kì….Góa kui-kang lóng leh siūⁿ kóng ài iōng siáⁿ pān-hoat, chiah ū hoat-tō͘ iōng siāng kín ê sok-tō͘ kā ông phah--sí….
Lí to̍h sī án-ne--lah! Chiah bô lâng beh hō͘ lí pàng-ká! Èng-kai--ê lí! Hó--lah, m̄ hâm lí ōe-sian--a, jīn-chin lâi chú-chhî, kin-á-ji̍t goán te̍k-pia̍t iau-chhiáⁿ goán só͘-ū ê kang-chok jîn-oân lâi kàu hiān-tiûⁿ, goán chit ê chiat-bo̍k chè-chok ê sî-kan mā chha-put-to ū pòaⁿ-tang, ta̍k-ê lóng sī iōng ka-tī khang-khòe í-gōa ê sî-kan, lâi chò chit ê chiat-bo̍k, kàu taⁿ, lán só͘-chò ê iáⁿ-phìⁿ í-keng hòng-sàng oân-sêng, siūⁿ beh chhiáⁿ ta̍k-ê lâi kóng kóa chham-ú chit ê chè-chok ê sim-siaⁿ sim-chêng án-ne.
Ū-iáⁿ, ta̍k ê to̍h lóng ài chek sî-kan chhut-lâi chò, chin sin-khó͘!
Lí lóng leh phah tiān-tōng! Bô chu-keh ìn chit khoán ōe--lah! Siōng bô chu-keh kóng-ōe--ê to̍h sī lí! Lán mài ka chhap! Lín siáng beh seng kóng? Hiah pì-sù? Bô góa lâi tiám-miâ--lah! Bô Bí-leng--ê, lí kóng-kó͘--ê seng iau-chhiáⁿ lí lâi kóng!
Ta̍k-ke hó, góa sī Bí-leng! Chin êng-hēng, ē-tàng tī “A-lông” chit chhut kóng-pò͘-kio̍k lâi kóng-kó͘ hō͘ ta̍k-ke thiaⁿ! Kám-siā A-chin in ang siá chhut chiah-nī chhù-bī ê kò͘-sū, mā to-siā Chò-kang-á-lâng thoân-tūi ê iú-chì, chit tōaⁿ sî-kan it-ti̍t kā góa o-ló, hō͘ góa ì-kiàn, góa chiah ē-tàng lú kóng lú ū sìn-sim, lú kóng lú liàn-tńg, ah mā ǹg-bāng kok-ūi thiaⁿ-chiòng lín ū kah-ì góa ê ián-chhut! Sī-kóng, chit chi̍p lo̍k soah, góa to̍h sit-gia̍p--ah neh! Hò͘~ Góa boaih--lah~ Góa beh kho̍k óaⁿ! Āu 1 chhut leh? A-chin-só--à! Kín kiò lín ang chhut-lâi bīn-tùi!
Bí-leng--ê, lí nah ē kiaⁿ sit-gia̍p, góa kan-na kiaⁿ góa bô ká thang pàng niâ! Bô góa ê khang-khòe lóng hō͘ lí chò--lah!
Hó͘! Lí bô kiù--ah! Bián siàu-siūⁿ--lah! Mai the̍h--lâi, sòa--lòe, lán iau-chhiáⁿ lán ê ōe-su kiam kio̍k-pún chhòng-chok, Chiá-siông!
Ta̍k-ke hó, góa sī Chiá-siông, khah chá in-ūi khang-khòe ê koan-hē, ū 1 tōaⁿ sî-kan tiāⁿ-tiāⁿ leh cháu lo̍k-im-sek, chū hit-tang-chūn khai-sí, góa to̍h kám-kak phòe-im chit ê khang-khòe chiâⁿ chhù-bī, bô siūⁿ kóng 20 tang liáu-āu, kèng-jiân ū lâng chhōe góa tàu-tīn chò Tâi-gí ê chiat-bo̍k, ah m̄ to̍h ka-chài góa mā ē-hiáu kóng Tâi-gí, chiah ū chit ê ki-hōe, chiâⁿ chōe tāi-chì to̍h sī án-ne, lí chóng-sī ài ē-hiáu, ji̍t-āu lí tú tio̍h hit ê ki-hōe ê sî-chūn, lí chiah lia̍h ē chāi, o̍h Tâi-gí bô pāi-hāi lah, ta̍k-ke tàu-tīn lâi kóng Tâi-gí, Tâi-gí chhut thâu thiⁿ.
To-siā Chiá-siông! Ĕ, kî-koài? Lí tú-chiah nah ē kóng Chiá-siông sī kio̍k-pún? Lán ê ang-á lóng i ōe--ê góa chai, súi koh kó͘-chui!
Lán tong-jiân ū āu 1 ê chè-chok--ā, tī chia bē-tàng kóng siuⁿ chē, hō͘ góa sîn-pì--1-ē! Koh lâi lán iau-chhiáⁿ Tiⁿ-ké lâi kóng! Tiⁿ-ké chhiáⁿ!
Ta̍k-ke pêng-an, góa sī Tiⁿ-ké. Góa sǹg sī siōng lo̍h-bóe chiah ka-ji̍p chò-lâng-á-lâng thoân-tūi ê sêng-oân, chin hoaⁿ-hí ē-ĕng saⁿ-kap lâi chè-chok chia ê chok-phín, chit-pái ē-tàng oân-sêng A-lông chit ê kóng-pò͘-kio̍k si̍t-chāi kám-kak chiâⁿ sim-sek mā kài kám-tōng. In-ūi góa khah chá koh án-ná siūⁿ to bē siūⁿ tio̍h góa kèng-jiân ē-ĕng kō͘ Tâi-gí lâi ián-chhut. Sòa--lo̍h-lâi mā ài chhiáⁿ kok-ūi thoân-oân kap thiaⁿ-chiòng pêng-iú to-to chí-kàu! Sī kóng, góa khai-sí kóng Tâi-gí ê sî-kan èng-kai mā sī thoân-tūi--ni̍h siōng té--ê. Ùi ha̍k-si̍p Pe̍h-ōe-jī khai-sí kā góa ê bó-gí o̍h tńg--lâi ū-iáⁿ sī hō͘ góa ke chiok chē chū-sìn. Jî-chhiáⁿ mā bô kài khùn-lân, mā chin kám-siā ta̍k-ke bô kā góa khì-hiâm. Hong-hù lán ê giân-gí, lán kè-sio̍k phah-piàⁿ!
Hó! To-siā Tiⁿ-ké, thiaⁿ liáu chin-chiàⁿ hō͘ lâng kài kám-tōng hoⁿh! Sòa--lòe tio̍h siáng?
Án-ne lán chhiáⁿ lán hū-chek iáⁿ-phìⁿ, bāng-chām, thêng-sek, pêⁿ-tâi soan-thoân ê Ko͘-chiáu, bō͘-āu ê khang-khòe chha-put-to lóng i teh chò, phāiⁿ chin tāng! Tio̍h lí kóng! Chhiáⁿ!
Ta̍k-ke hó, góa sī Ko͘-chiáu, Ko͘-chiáu chhah lâng kûn ê Ko͘-chiáu. Ū 1 ji̍t, Niau-tāu thoân 1 ê im-tòng hō͘--góa, kóng he sī i hâm A-chin in ang koh Bí-leng teh chò ê tāi-chì, mn̄g góa kám ū chhù-bī, kám beh ka-ji̍p? Lo̍k-im tùi góa lâi kóng, sī 1 chân chiok chia̍h-la̍t ê tāi-chì, iû-kî sī beh lo̍k 1 ê kah góa kò-sèng oân-choân bô-kâng ê kak-sek, he koh khah chia̍h-la̍t, só͘-pái it-ti̍t hō͘ thoân-tūi phah-chhèng têng lo̍k, put-jī-kò, chiong-kî-bóe iah sī kā tāi-chì chò hó--ah. Kám-siā thoân-tūi tùi góa ê pau-iông, mā kám-siā thoân-tūi tùi A-lông chit ê kò͘-sū ê iōng-sim, hō͘ A-lông ē-sái sūn-lī chiūⁿ-sòaⁿ, ǹg-bāng ta̍k ê ē kah-ì A-lông chit ê kò͘-sū.
To-siā Ko͘-chiáu! Góa kám-kak lí ián-chhut ê A-bêng ū-iáⁿ kài oa̍h-thiàu neh! Ū kàu lī-hāi! Koh ū siáng bô kóng--tio̍h-ê?
Hó--lah! Bô ōaⁿ góa kóng hó--ah!
Góa tī thoân-tūi hū-chek ê sī chhú-lí im-tòng, tī thoân-tūi lāi-té o̍h tio̍h chin-chē, chhin-chhiūⁿ im-chit ê hó-bái, chhú-lí ê hong-hoat bô kâng, ē ū chin tōa ê cheng-chha, chhiáⁿ ta̍k ê chù-sim kā goán thiaⁿ khòaⁿ-māi, koh ū to̍h-sī thoân-tūi ê ta̍k-ê lóng liâu lo̍h-khì lo̍k-im, chit-chióng siaⁿ-im ê piáu-ián chin chhù-bī, goán sńg liáu chin hoaⁿ-hí, mā ǹg-bāng ta̍k-ê ē kah-ì, chòe-āu siūⁿ beh kóng--ê sī, hō͘ Tâi-gí ê sè-kài ke 1 kóa chhù-bī--ê, bô kāng-khoán--ê chok-phín, ta̍k-ê chò-hóe lâi kā goán tàu phâng-tiûⁿ ŏ͘, ló͘-la̍t, to-siā.
Hó, góa to̍h kán-tan kóng kàu chia, to-siā kok-ūi koan-chiòng hō͘ goán chē chē ê chi-chhî kah kó͘-lē, koh lâi A-lông Sió-sû-tián koh ū ke chò kúi chhut, hoan-gêng lāu chú-kò͘, lāu pêng-iú kè-sio̍k lâi kā goán phâng-tiûⁿ ŏ͘! Ū-êng koh lâi ŏ͘! Bái-bāi!
Tán--leh tán--leh! Góa bô kóng--tio̍h neh!
Kan-na siūⁿ beh pàng-ká ê lâng bô ài hō͘ lí kóng--lah!
Lí mā khah hó-sim--leh! Góa mā ū chò khang-khòe neh! Pài-thok--leh-lah!
Hó--lah! Mai sa--khì!
Án-ne góa mā ài lâi o̍h lín kóng hō͘ khah kám-sèng--leh! Ta̍k-ke pêng-an! Góa sī A-chin in ang! To-siā kok-ūi thiaⁿ-chiòng ē-tàng pôe-phōaⁿ goán kàu taⁿ! Sim-lāi si̍t-chāi chin hoaⁿ-hí!
Ū ê lâng ē kóng kóng Tâi-gí chin khùn-lân, siá Tâi-bûn koh jú khùn-lân, góa to̍h siūⁿ kóng, put-jû lán lâi siá 1 ê kò͘-sū, iōng kóng-kó͘ ê hong-sek, ta̍k-ke ē-tàng iōng thiaⁿ--ê, nā ū chhù-bī mā ē-sái lâi khòaⁿ Tâi-bûn sī beh án-chóaⁿ siá, hûiⁿ-ti̍t ū siaⁿ thang hō͘ lí tùi, beh tòng-chò kàu-châi lâi o̍h Tâi-gí ûn-ná sī bē-bái, to̍h liâu--lo̍h-khì-ah án-ne. Tī chia, lo̍k-im chha-put-to sī góa tē 1 piàn ê keng-giām, nā ōe kóng tio̍h bô hó-sè, chhiáⁿ to-to pau-hâm. Chòe-āu góa siūⁿ beh kám-siā chò-kang-á-lâng ê thoân-tūi, hō͘ góa hiah hē chū-iû, sûi-chāi góa hoat-hui, mā kà góa chin chē góa pún-té lóng bē-hiáu ê tāi-chì, hâm lín tàu-tīn chò khang-khòe, góa chin hoaⁿ-hí, iû-kî sī ta̍k-ke tâng-chê jīn-chin kā 1 kiāⁿ tāi-chì oân-sêng, si̍t-chāi kám-tōng! Chhin-chhiūⁿ A-lông ê kò͘-sū án-ne, beh chò Tâi-gí, kāng-khoán ài chio 1 tīn phōaⁿ chò-hóe kiâⁿ khah ē khùiⁿ-oa̍h. Chòe-āu ê chòe-āu, góa it-tēng ài pó͘-chhiong--ê to̍h sī, góa siūⁿ beh pàng-ká! Góa beh hioh-khùn! Góa bih--khí-lâi ê sî-kan iû-koh kàu--ah! Kám-siā kok-ūi!
Án-ne hō͘ lí siā-bō͘!
Hó! Chin-chiàⁿ ū hit khoán “Ah! Beh kiat-sok--ah neh!” ê sim-chêng! Hó! Kāng-khoán mā sī hit kù to-siā! Sui-bóng goán ê chok-phín kah lêng-le̍k iáu ū chin chē chìn-pō͘ ê khong-kan, m̄-koh mā kám-siā kok-ūi hō͘ goán chi-chhî, kā goán kó͘-lē, chhiáⁿ kok-ūi thiaⁿ-chiòng pêng-iú sió tán-thāi! Siong-sìn bián koh jōa kú! Sin ê chok-phín to̍h ū hoat-tō͘ koh chhut-sì! Kāng-khoán tī lán chit ê chò-lâng-á-lâng pîn-tō hòng-sàng! Kàu-sî chhiáⁿ kok-ūi koh kè-sio̍k kā goán chi-chhî ŏ͘! Ló͘-la̍t! To-siā! Pái-pāi!
Chài-hōe!
Lí bián soan! Tán--leh lâu lo̍h-lâi khui-hōe haⁿh!
Ĕ~~~~!
Lí sī leh o̍h he tiān-sī--ê Ji̍t-pún má-mah kài tio̍h kiaⁿ o͘h! Khah jīn-miā--leh, kiâⁿ lah!
Hò͘--iò͘~~~~ M̄ mài--lah!
Bián ai! Khah jīn-hūn--leh!
